Қарашаның 19-ы күнi Әзiрбайжан Мәмбетовпен қоштасу үшiн Астанадағы Қ.Қуанышбаев атындағы драма театрына ағылып келiп жатқан қаралы нөпiрде шек болмады. Осы күнi Мәмбетов мәйiтi Алматыға жөнелтiлдi. Әзағаң көзi тiрiсiнде Алматыдағы Кеңсай зиратынан, жан жары, марқұм Ғазиза Жұбанованың жанынан өзiне орын әзiрлеп қойған едi...

Әзiрбайжан Мәмбетов қазақтың театр өнерiн әлемдiк деңгейге көтердi. “Ана – Жер ана”, “Қарақыпшақ Қобыланды”, “Қан мен Тер”, “Ғасырдан да ұзақ күн” Бұл қойылымдардың бәрi де – қазақ өнерiнiң алтын қорына қосылған асыл қазыналар.

Ә.Мәмбетов Ресейде туды. Орыс мектебiнде оқыды. Онан соң Мәскеудiң ГИТИС-iн бiтiрдi. Жүрегi әманда “қазақ” деп соққан Әзағаң қысқа уақыттың iшiнде қазақшаны жан-жақты әрi терең меңгерiп, ұлттық режиссураға жаңа мазмұн мен жаңа форма дарытып, ұлттық сахна өнерiн биiк белеске көтердi. Қарап отырсаңыз, бұл да – ерлiк. Үлкен ерлiк. Орысша оқып, өмiр бойы орыстың тiлi мен дiлiнiң мүддесiн көздеп өтетiн қазақ оқығандары аз емес арамызда...

Театр сыншылары 1960-1990 жылдарды “Мәмбетов дәуiрi” деп өте орынды атайды. Рас, Ә.Мәмбетовтың дәуiрi аяқталды. Бiрақ, Әзiрбайжан Мәмбетовтың мектебi – мәңгiлiк. Әзағаңның өнердегi ұлы өнегесi мен зор тағлымы мәңгi жасай бередi!