10 қараша 2009
Аңқау елдi тағы алдар – жауабы дайын сауалдар
13 қараша күнi жылдағы үйреншiктi әдетi бойынша президент Н.Назарбаев жұртшылықтың сұрақтарына телефон, интернет желiсi және SМS жүйесi арқылы жауап бередi. Биыл да бұрынғыдай жүз мыңдаған сауал қойылып және олар сүзгiден өткiзiлiп, сұрыпталып, ең таңдаулылары ғана президенттiң құлағына құйылары анық. Әйтеуiр, елдiң мұң-мұқтажы мен халықтың жағдайы туралы сұрақтар ол кiсiге жетпейтiнi айдан анық. Көптеген сауалдардың Астана қаласының көркеюi, серпiндi жобалар, қарышты экономика, ұйыған инновациялық қор т.б. таңғажайып қияли қадамдар жайлы болатыны бесенеден белгiлi. Мұның бәрiн билiкке тәуелдi телеарналар бiрiмен-бiрi жарыса көрсетедi.
Оппозиция өкiлдерiнiң елдiң қазiргi нашар әлеуметтiк жағдайы, өзектi мәселелерi туралы қойған сауал-сұрақтары Назарбаевтың назарынан тыс қалып қоятыны баршаға аян. Соңғы кездерi тапсырыс бойынша жасалып жатқан «Мәңгiлiк президент», «Ұлт көшбасшысы» жобаларын қолдайтын тiлек- өтiнiштердiң қарша жауатынын бәрiмiз де бiлiп отырмыз. Тiптi, «сiз кетпеңiзшi, сiз кетсеңiз ел басқаратын адам жоқ. Күнiмiз қараң болады» деген жағымпаздардың жалынышты үнiн де естiп қалуымыз ғажап емес. Сөйтiп, жағымпаздық марафоны одан әрi жалғасып, билiк осылайша референдум өткiзген болып, бiр оқпен екi қоянды атады. Ал қарапайым халықтың билiкке жақпайтын өз мұң-мұқтаждары туралы сауалдары жауапсыз қалады. Осылайша қолдан iстелген тамаша сценариймен өтiп, халықтың ризашылығына бөленген президентпен сұрақ-жауап сұхбаты өте жоғары деңгейде өттi деген жаңғырық жаңалықтар билiктiң ақпарат құралдарында шегiрткедей қаптайды. Мiне, өгiздi де өлтiрмей, арбаны да сындырмау деген осы, отандастар....
Нұркамал Аязбаев,
Маңғыстау облысы,
Ақшұқыр ауылы.
Уәж айту