Газетiмiздiң өткен нөмiрiнде Қазақстан менеджмент және экономикалық болжау институты студенттерiнiң ата-аналары баспасөз мәслихатын өткiзiп, оқу ордасындағы былық-шылықтың бетiн ашып, институт басшылығының заң бұзушылықтарын әшкерелегенiн жазған едiк (“Лаңкестiң әкесi – декан, жыныстық зорлықшыл – ұстаз. ҚМЭБИ таңдауы осындай болса, кiмге бiлiм берiп жарытпақ?”, “ЖА”, №39, 18 мамыр). Баспасөз мәслихатында ата-аналар ҚМЭБИ халықаралық аккредитациядан өтпегенiн, институттың дипломы шетелде жарамсыз болып танылғанын мәлiмдеген-дi. ҚМЭБИ студенттерi ата-аналары атқарушы комитетiнiң төрағасы Байкарим Түтенов институттың қаржылық және кадрлық саясаты күмәндi деп, оқу ордасы басшылығына бiрқатар ауыр айып таққан болатын. Сондай-ақ баспасөз мәслихатына қатысқан ҚМЭБИ-дiң бұрынғы профессоры Хол Фостер де институттағы бiлiм халықаралық талапқа сай еместiгiн, оқу ордасы ҚазҰУ мен Халықаралық бизнес академиясының шаңында қалып қоятынын айтқан.
Баспасөз мәслихатын өткiзген Байкарим Түтеновке хабарласқанымызда, ол ҚМЭБИ-дiң талап-арызын әлi көрмегенiн, онымен таныспағанын жеткiздi. “Өздерiңiз институт басшылығын сотқа бердiңiздер ме?” дегенiмiзге: “Жоқ. Өйткенi талап-арызды дайындап, құжаттарымызды құнттап жатқан жайымыз бар”, – деген жауап алдық. “ҚМЭБИ-дiң мәлiмдеуiнше, сiз жеке басыңыздың мақсатын көздеп жүрген көрiнесiз. Бұған не дейсiз?” деген сұрағымызға Б.Түтенов былай дедi: “Институт беделiне кiр келтiру мақсатын көздеген жоқпын. Екi балам да ҚМЭБИ-де оқиды. Сондықтан балаларым мен төлеп жатқан ақшаға сай жақсы бiлiм алсын деген мақсатты көздедiм. Қандай да бiр пайдакүнемдiктi де көксегенiм жоқ. Өзiм институт басшылығы үстiнен түсiретiн талап-арызда 1 теңге көлемiнде ғана моральдық шығын талап етемiн”. “Институт сiз таққан айыптарды дақпырт деп бағалапты...” – дей бергенiмiзде, Б.Түтенов: “Баспасөз мәслихатында айтылған әрбiр фактiнi растайтын дәлелдерiм бар. Сондықтан менiң сөздерiм дақпырт емес. Таққан айыптарымды дақпырт деп отырған ҚМЭБИ-дiң бұл әрекетi жай ғана PR-қадам. Одан да ҚМЭБИ бұл фактiлердiң шын мәнiнде рас иә жалған екенiн ашып айтсын. Егер олар бұл фактiлердi жоққа шығарса, менiң қолымда мұны растайтын деректер бар. Ал егер ҚМЭБИ бұл жайттарды растаса, оқу орнын ретке келтiрсiн. Бiрақ ҚМЭБИ түсiндiрме бермей отыр. Қысқасы, менiңше, институт бұл фактiлердiң рас екенiн мойындағысы келмейдi”. Б.Түтенов ҚМЭБИ-ге қарсы сот процесiне тас-түйiн дайын отырғанын мәлiмдедi. “Қоғам ҚМЭБИ-дегi былық-шылықтың барлығын бiлуi тиiс. Сотқа БАҚ өкiлдерiн қатыстырып, бәрiн әшекере етемiн”, – дедi ол.
