4 ақпан 2010
Сәукеленi қайтарыңыз, Иманғали!
Бiрде Маңғыстау мұражайларын аралап жүрген Астанадағы бiр «дәудiң» әйелi кенет гауhартаспен көмкерiлген, құны баға жетпес жүзiктi көрiп қалыпты. Қолына киiп қарапты да, тағып алып, жүре берiптi. Сол жүзiк сол кеткеннен мол кетiптi.(Ел аузынан).
Форт-Шевченко қаласындағы тарихи ескерткiштер мұражайында адай қыздың қызыл былғарыдан жасалған сәукелесi бар болатын. Сол Форт-Шевченкоға жол түсiп барғанда осы сәукеленi де көру үшiн мұражайға арнайы соғатынбыз. Соңғы 4-5 жылдықта барғанымда, сәукеле орнында болмай шықты және көшiрмесi де жоқ. Мұражай қызметкерлерiнен сұрағанымда, сәукеленi сол кезде Алматы қаласының әкiмi Иманғали Тасмағамбетов сұратып алдырғанын, өздерi қайтаруды талап ете алмай отырғанын естiдiм. Мүмкiн, Иманғали Астанадағы мұражайға, не өзiнiң жеке мұражайына қою үшiн алдырған болар. Берiректе сол сәукеле көзiме оттай басылып теледидардан бiр жылт ете түскенi бар. Бұл – Қазақ мемлекетiнiң ешбiр жерiнде кездесiп көрмеген жалғыз ғана адай қыздың сәукелесi. Осыған салпыншақ құлағы ұқсайтын сәукеленi әншi Тамара Асар ән салғанда киiп жүр, бiрақ жасалу материалы бөлек.
Сұраусыз кеткен осы жәдiгердi өз орнына қайтаруды Иманғали Тасмағамбетов мырзадан сұраймыз және талап етемiз. Ал өздерiнде сәукеленiң көшiрмесiн қалдырса да жеткiлiктi емес пе? Форт-Шевченконың мұражайы сәукелесi кеткелi жетiмсiреп қалғандай.
Қайтып келген сәукеленi әншi Тамараға бiр кигiзiп ән салдырып, облыстық музейге қойса да артық емес.
Сегiзбай ӘНЕС.
Шетпе кентi
Маңғыстау облысы.
Уәж айту