Ендi екi күннен кейiн Қазақстан құрамасының хоккейшiлерi Жапонияның Нагано қаласында өтетiн халықаралық турнирге қатысады. Андрей Шаянов баптайтын ұлттық құрамамыз Словения, Дания және Жапония елдерiмен күш сынасады. Күншығыс елiнде дәстүрлi түрде өтiп тұратын жарысқа Қазақстан құрамасының бас бапкерi Андрей Шаянов алыс-жақын шет елдерде ойнап жүрген ойыншылардың барлығын дерлiк шақырыпты. Бас бапкердiң мұндай қадамға баруын мамыр айының басында Германияда өтетiн әлем бiрiншiлiгiмен байланыстыруға болады. Дүниежүзiлiк доданың алдында командаға барлық үздiктердiң басын қосып, баптарын байқау бас бапкердiң басты мақсатының бiрi. Жапон жерiнде болатын турнирде Қазақстан құрамасының қарсыластары да осал емес. Мәселен, Дания құрамасы әлемдiк рейтингте Қазақстан құрамасына қарағанда бес саты жоғары тұр. Соңғы рет Қазақстан құрама командасы Дания хоккейшiлерiмен 2006 жылы Латвияда өткен әлем бiрiншiлiгiнде кездесiп, 2:3 есебiмен ұтылып қалған-ды. Наганодағы турнирге қатысатын Словения хоккейшiлерi де осал емес. Алайда қазақстандықтар словениялықтарға қарағанда хоккейдi тәуiр меңгерген. Ал Жапония ше? Жапондар әрине, өз айдынында өтетiн жарыста барын салатыны анық. Соңғы екi бiрдей қысқы Азия ойындарында отандастарымыздың алдын орап, алтын алқа таққан жапондар Қазақстан құрамасының басты қарсыласы екенi сөзсiз. Ұлттық құраманың бас бапкерi Андрей Шаянов командаға негiзiнен “Барыс” хоккей клубының ойыншыларын шақырды. Сондай-ақ, Ресейден Дмитрий Уппер, Виталий Еремеев, Андрей Трощинский және Денис Шемелин сынды Өскемен хоккей мектебiнiң түлектерi де ұлттық құраманың жейдесiн кидi. Өкiнiшке қарай, Астананың “Барысында” жасындай жарқылдап өнер көрсетiп жүрген Талғат Жайлауов жарақатына байланысты Жапониядағы турнирге бара алмайтын болды.
