Бұдан былай 10 мың доллар қаржысын жұмсаған кез келген қазақстандық күдiктi ретiнде қаржы барлаушыларының нысанасына iлiкпек. Мәселен, банктен шот ашсаңыз да, сақтандыру төлемдерiн алсаңыз да, мәшине, үй, тағы басқа қымбат мүлiк сатып алсаңыз да немесе шетелге 7 миллион теңгеден асық ақша жiберсеңiз де мемлекеттiң қырағы назарына түсесiз. Осылайша, жаңа қабылданған «Заңсыз жолмен тапқан табысты заңдастыруға және терроризмдi қаржыландыруға қарсылық туралы» заң қаржы барлаушыларының бiлегiн түргiзiп отыр. Заңға енген өзгерiс казинодан ақша ұтқандар мен валюта алмастыру дүңгiршектерiнен 10 мың доллар сатып алған немесе сатқандарға қиынға түскелi тұр. 300 мың долларға жылжымайтын мүлiк сатып алушылар мен сатушылар да арам ақшаны ағартушы немесе терроризмдi қаржыландырушы ретiнде күдiктiге айналып шыға келетiн болды.
